Wīglaf wæs hāten,  Weoxstānes sunu,
lēoflic lind-wiga,  lēod Scylfinga,
mǣg Ælfheres;  geseah his mon-diyhten
2605under here-grīman  hāt þrōwian;
gemunde ðā ðā āre,  þe hē him ǣr forgeaf,
wīc-stede weligne  Wǣgmundinga,
folc-rihta gehwylc,  swā his fæder āhte;
ne mihte ðā forhabban,  hond rond gefēng,
2610geolwe linde,  gomel swyrd getēah.
Þæt wæs mid eldum  Ēanmundes lāf,
*suna Ōhtere[s],^[1]  þām æt sæcce wearð,⁠Fol. 188a.
wræcca[n]^[2] wine-lēasum,  Weohstān^[3] bana
mēces ecgum,  ond his māgum ætbær
2615brūn-fāgne helm,  hringde byrnan,
eald sweord etonisc,  þæt him Onela forgeaf,
his gædelinges  gūð-gewǣdu,
fyrd-searo fūslīc;  nō ymbe ðā fǣhðe spræc,
þēah ðe hē his brōðr  bearn ābredwade.
2620Hē frǣtwe gehēold  fela missera,
bill ond byrnan,  oð ðæt his byre mihte
eorl-scipe efnan  swā his ǣr-fǣder;
geaf him ðā mid Gēatum  gūð-gewǣda
ǣghwæs unrīm,  þā hē of ealdre gewāt
2625frōd on forð-weg.  Þā wæs forma sīð
geongan cempan,  þæt hē gūðe rǣs
mid his frēo-dryhtne  fremman sceolde;