< The Book of Scottish Song
The Bridal Day.
[Words by W. Paul. Composed by J. P. Clarke.]
O, I maun braid my yellow hair,
An' I maun busk me braw,
An' I maun to the greenwood gang
Whatever may befa';
An' I maun say the word at e'en,
That brings me weel or wae,
For Jamie press'd me sair yestreen,
To set the bridal day.
O little does my father think
That he maun ware his gear,
And little does my minnie think,
The trysting hour is near;
But yonder blinks the e'ening star
O'er Roslyn castle gray,
An' I maun to the greenwood gang,
To set the bridal day.
This article is issued from
Wikisource.
The text is licensed under Creative
Commons - Attribution - Sharealike.
Additional terms may apply for the media files.